Dit voel asof dit net gister was toe ek as ’n graad 8-leerder vir die eerste keer deur die groot blou hekke van Goudveld-Hoërskool gestap het. Ek was vol verwagtinge – en Goudveld het elkeen daarvan oortref.

Goudveld is ’n skool waar elke leerder die geleentheid kry om te groei – of dit nou op die sportveld, in die klaskamer of op kulturele gebied is. Hier het elke leerder ’n plek, en elke leerder maak saak.

Dit is ook ’n plek waar ek my geloof vryelik kon uitleef, sonder om ooit daaroor skaam te wees.

Nou, in my matriekjaar, voel ek nie hartseer of bang om die grootmenswêreld te betree nie, want Goutieland het my toegerus met die regte gereedskap om met selfvertroue my lewenspad te begin stap.

As ek terugkyk op die afgelope vyf jaar, kan ek nie anders as om met trots te glimlag nie. Trots dat ek deel kon wees van só ’n besondere gemeenskap, met toegewyde en merkwaardige opvoeders wat werklik omgee.

Die herinneringe en lewenslesse wat ek by Goudveld geleer het, sal ek vir altyd koester.

Ek wil julle los met Prediker 3:1 “Daar is ’n tyd vir alles, en ’n seisoen vir elke saak onder die hemel.” Geniet hierdie seisoen!